تجربتي مع فاونديشن Studio Fix Fluid من Mac
اول شي ماركة ماك في غنى عن التعريف من أفضل ماركات المكياج في العالم و لكن في واجد ناس يحبو كريم الاساس متاعهم و ايضا واجد ناس يكرهوه.
في ناس يشكو من انه يسبب حساسية و يطّلع حبوب ممكن هذا عيبه الوحيد بالنسبة لبعض الناس، بس طبعا في ناس ما يديرلهمش في حبوب.

اول شي ماك عندهم خمسة انواع فاونديشن هذا الي بنحكي عليه اليوم اسمه Studio Fix Fluid سائل مناسب للبشرة الدهنية تغطيته مِن متوسطة الى ثقيلة يجي من غير الpump اعتقد ترجمتها "مضخة؟" مش عارفة المهم لازم تشروها بروحها و الا عملية تطليع الفاونديشن من العبوة حتكون فيها تلبيز و مرة يطّلع واجد مرة ما يطلعش بكل.

الفاونديشن هدا جتني فترة طويلة استعملته لما كان عندي مشاكل في بشرتي و هذا الي حيأخذنا لمزاياه.
تغطيته عالية شبه يغطي كل شي و ميزة ثانية ان نوعا ما يدوم لفترة طويلة.
فيه حماية من الشمس 15 هدي فايدة بس بسيطة جدا يعني لازم لازم تحطو واقي من الشمس قوي ما تعتدموش عالحماية الي فيه .
لازم ترطبو و تحطو برايمر قبل الفاونديشن عالاقل كطبقة عازل.

حسب موقع ماك مكتوب انه يتحكم في الزيوت صالح للبشرة الدهنية و المختلطة و انه يدوم فترة طويلة.

أسعار فاونديشن ماك يعتبرو متوسطات هذا سعره 24.50£ تقريبا و الpump او المضخة تقريبا 2.50£

حسب تجربتي الفاونديشن يدهن بعد ساعتين على جسر الأنف و للعلم انا بشرتي مش دهنية... و انا هذا من رايي عيب.
ايضا الفاونديشن هدا تقيل و لا يفضّل للاستعمال اليومي نظرا ان ممكن يسبب مشاكل للبشرة على المدى البعيد يعني احرصو انكم تهتمو ببشرتكم و نظافتها بش ما تضطروش ان تغطوها ديما.

كنت نحب الفاونديشن هدا واجد بس توا ممكن نستعمله مرة بعد كم و خلاص مش من المفضلات عندي.

يعني ممكن نعطيه 3.5 من 5