ريفيو النهارده عن كريم التقشير من Pharmaceris.egypt
Pharmaciers almond peel 10%
بنات كتير الفترة اللي فاتت كانت بتسألني عن كريم تقشير للبشره كلها و كنت عملتلكم فيديو عن تقشير احماض الفواكه و الكريمات اللي نقدر نستخدمها في البيت بس هكلمكم النهارده بقي عن كريم استخدمته بشكل شخصي الفتره اللي فاتت و عجبني و قررت اعملكم ريفيو كامل عنه ⁦❤️
هو عباره عن كريم تقشير يومي يحتوي علي ال mandalic acid بيعمل تقشير للجلد الميت اللي علي سطح البشره و بينظم إفرازات الدهون و اللي اهم من ده كله أنه بيساعد جدآ في علاج الرؤوس السوداء و البيضاء المحبوسه تحت الجلد ( white and black comedones ) لانه بيقشر الجلد الميت اللي علي سطح البشره اللي حابس الدهون الزيادة تحتيه و مانعها انها تخرج و مسبب الرؤوس البيضا.
هو كمان بيساعد ع تجديد خلايا البشره خصوصاً بقي بعد فترة الصيف دي و اغلبنا بشرته اتحولت ع الأقل درجة أو درجتين ناحية السمار فبيساعد جداً ع انك تقشري الطبقه السطحيه الغامقه دي و ترجعي للون الطبيعي 
هو كمان فعال في علاج اثار الحبوب البنية بس الجديده شويه مكنش عندي اثار قديمه علشان اقدر احكم عليه فالنقطه دي ⁦👌🏻
من احسن مميزاته كمان أنه بيقشر بشكل خفيف يعني مناسب لو حد بيشتغل أو بيخرج للجامعه يوميا لأنه مش بيعمل شكل تقشير واضح اوي يعني مع استخدام المرطب و الصن بلوك صباحاً القشور الخفيفه دي مش هتبان اوي .
كمان احسن حاجه فيه أنه مش بيلسع خالص و مش لازم ضلمه و كمان حساه هيبقي مناسب جداً لاي نوع بشره حتي لو كانت حساسه لان زي ما قلتلكم هو مش بيلسع خالص بس ده برضه ميمنعش أن أي كريم تقشير لازم نجربه الاول علي حته صغيره من البشره الاول و كمان فالبدايه ممكن نحطه لفتره صغيره و نغسله بعد كده نزود الفتره بالتدريج خصوصاً لو اول مره تعملوا تقشير أو بشرتكم حساسه بس انا شخصيا كنت بنام بيه عادي.
القوام بتاعه جل كده و بارد شويه هو بيعمل طبقه شويه مش بيمتص يعني من البشره اوي بس مناسب لكل انواع البشره.
هو كمان بيستخدم بشكل يومي عادي جداً مساءا و لفترات طويله برضه مفيش مشكله بس يعني انتوا هتستخدموه لحد ما يقشر بشرتكم بالشكل المطلوب بعدين توقفوه و ترجعوله لما احتاجوا تاني بس كمان متستعجلوش نتيجته لان زي ما قلتلكم هو تقشير خفيف و لطيف شويه يعني ممكن ياخد من اسبوع ل ١٠ ايام علشان يبدأ يقشر و برضه في ناس ممكن يقشر معاهم قبل كده طبعاً 
انا كنت جيباه تقريباً بحوالي ١٨٠ جنيه و بكده تقريباً قولتلكم كل حاجه عن تجربتي معاه