شكل القرين و ما هو قرين الانسان 

ما تيجو نبعد عن كل المؤلفات، كل الترهات، كل شيء اتنسب للقرين، ونعرف مع بعض إيه حقيقة القرين، أو شيطان النفس كما أطلق عليه البعض!

عارف إنك بتسأل نفسك دايمًا يطلع إيه القرين، وهل أنا فعلًا معايا شيطان دايمًا بيراقبني، وهل ممكن يئذيني، هجاوبك على كل الأسئلة في رحلة النهارده.

ازيك يا صديقي، عامل إيه، اتمنى تكون بخير، فاكرني؟! أنا الكاتب محمد صاوي، جايب لك النهارده حقيقة اتلوثت بآلاف المؤلفات عبر التاريخ، حقيقة لها أصل ديني، لازم تصحح مفاهيمك فيها.
رحلة النهارده مرعبة، مقبضة، ولكن مينفعش تفوتها، لأنك لازم تعرف، هل فعلًا فيه شيطان بيراقبك وإنتَ قاعد في أوضتك بليل، ولا كل دي مؤلفات؟!
جاهز؟! مشروبك المفضل، فضي عقلك، ركز معايا، يلا بينا.

-

القرين، أو ما يُعرف بشيطان النفس، أو المرافق للإنسان على الأرض!
كلنا مؤمنين بوجود الجن لأن ربنا سبحانه وتعالى ذكره، والشيطان من فصيلة الجن، ولكنه وصل لمرحلة من الكفر كبيرة خد بسببها لقب شيطان، والشيطان بتُطلق على كل متمرد مفسد، ولأن (إبليس) تمرد على الله عز وجل أُطلق عليه الشيطان، واتلعن في الكتاب.

الشيطان واخد عهد على نفسه إنه يوسوس للإنسان ويتسبب في ارتكابه للمعصية، يغويه، (قَالَ رَبِّ بِمَا أَغْوَيْتَنِي لَأُزَيِّنَنَّ لَهُمْ فِي الْأَرْضِ وَلَأُغْوِيَنَّهُمْ أَجْمَعِينَ (39) إِلَّا عِبَادَكَ مِنْهُمُ الْمُخْلَصِينَ (40)) سورة الحجر.
والطريقة للتخلص من الشيطان هي الاستعاذة والحذر منه زي ما اتذكر في القرآن والأحاديث النبوية وأقوال العلماء.
الإمام (ابن القيم) قال:
(أعلم أن لفظ عاذ وما تصرف منها يدل على التحرز والتحصن والنجاة، وحقيقةً معناها الهروب من شيء تخافه إلى من يعصمك منه، ولهذا يسمى المستعاذ به معاذًا كما يسمى ملجأ ووزرًا).
وقصده هنا إن الاستعاذة هي الالتجاء والاعتصام بالله من الشيطان.

الإنسان من بداية الخلق وهو نفسه غير سوية، مليان شوائب، بيُخطئ كتير، مليء بالشهوات، وده كان السبب الأساسي في صعوبة الامتحان من الله سبحانه وتعالى.
ربنا من بداية الخلق قال إن الشيطان لك عدو مبين، لازم تحذر منه، تسبب في خروج سيدنا (آدم) -عليه السلام- من الجنة، وقالها صراحةً لربنا إنه هيغوينا ليوم الدين، وربنا حذرنا منه كتير في كتابه العزيز، (يَا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ (208)) سورة البقرة.

ربنا خلق للإنسان رفيق، قرين من الشيطان، يلازمه دايمًا ويحاول يوسوس له بارتكاب المعصية، وخلي بالك وفرق بين القرين اللي مُسلط عليك ليك وحدك، وبيكون مع كل إنسان على وجه الأرض قرين، وبين الشيطان المكلف من (إبليس) في غواية البشر، ده حر طليق يغوي أي شخص هو يختاره، ولكن القرين دايمًا ملتصق فيك.

والقرين ميقدرش يأذيك أذى نفسي أو جسدي، مينفعش يتسبب لك في مس، بل هو مجرد وسواس في عقلك، ومينفعش تشوفه مهما مر من حياتك، هيفضل مختفي ولكنه موجود، ويُقال إنه ميقدرش يبعد عنك أكتر من 800 متر.

الرسول -صلى الله عليه وسلم- قال، حديث ورد في صحيح مسلم:
(- ما منكم من أحدٍ إلا وقد وُكل به قرينه من الجن.
قالو:
- وإياك يا رسول الله؟
قال:
- وإياي إلا أن الله أعانني عليه فأسلم فلا يأمرني إلا بخير.)

يعني الرسول -صلى الله عليه وسلم- قرينه مسلم بأمر من الله وبيأمره بالخير، ولكن قرين باقي البشر كافر.
في يوم الرسول -صلى الله عليه وسلم- خرج بالليل وساب السيدة (عائشة)، ولما رجع لقاها غاضبة منه، فسألها:
- أغِرتِ يا عائشة؟!
قالت:
- ومن لا يَغار على مثلك.
فقال لها:
- أجاءكِ شيطانك؟!
قالت:
- ألي شيطان؟!
قال:
- نعم، ما من ابن آدم إلا وله شيطان، حتى أنا لي شيطان فأعنني الله عليه فأسلم، فأصبح يأمرني بالمعروف وينهاني عن المنكر.

والقرين أحيانًا بيكون سبب في عدم التوبة..
شخص ارتكب معصية وقرر يتوب إلى الله، القرين دايمًا بيفهمه في عقله إن ذنبه لا يُغفر، وبيبصم على قلبه بالشر وبيقنعه، فيستمر الشخص في ارتكاب المعاصي.

القرين شيطان، ضعيف، ولكنه مبيبعدش بالاستعاذة زي باقي الشياطين، هو ملتصق بيك مهما حصل، وبتنتهي مهمته بموتك.

القرين شيطان كل مهمته إغوائك وإضلالك، وميقدرش يتدخل في قدرك أو يغير في حياتك تغيير مادي، زيه زي أي شيطان، وكل ما إيمانك ضعف كل ما قوة القرين زادت، ولو إيمانك قوي هو بيكون ضعيف جدًا وواهن وصعب يوسوس لك.

(ابن عثيمين) قال إن القرين ربنا بعته للإنسان وسلطه عليه اختبار له، يأمره بالفحشاء وينهيه عن المعروف، علشان يشوفه هيتبع الشيطان ولا هيتمسك بمغفرة الله، (الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ (268)) سورة البقرة.

والعبد الصالح اللي قلبه نقي وصادق هو اللي يقدر يتغلب على القرين، (وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۖ إِنَّهُ هُوَ السَّمِيعُ الْعَلِيمُ (36)) سورة فصلت.
تمسك بربك والجأ له والقرين هيكون دايمًا ضعيف، ومعنى نزغ الشيطان إنه يأمرك بفعل معصية، فعلشان كده ربنا بيقول نستعذ بيه من الشيطان عمومًا، حتى من نفسك الأمارة بالسوء استعذ بربك وهو هينجدم.

الخلاصة يا صديقي، ربنا مخلقش إنسان إلا وخلق معاه قرين، ملازم البشر في كل شيء، أكل، شرب، نوم، كل حاجة في حياتك هو موجود فيها، بيوسوس لك دايمًا ترتكب المعاصي زي الزنا والقتل والشجار وغيره، مفيش حاجة اسمها سحر قرين، ومينفعش تشوف القرين، والدجالين اللي قالوا لك إن القرين بيمسك أو بيأذيك أو بيسحرك بيكدبوا عليك.

وحابب أقول لك في نهاية المقال، إنه موجود دلوقتي، جنبك، شايفك بتعمل إيه، وممكن يكون بيحاول يوسوس لك، ولكن متخافش، عمرك ما هتشوفه.

للأسف مقال النهارده صغير، اتمنى تكون استفدت، ويا ريت تدعمني بالشير واللايك علشان غيرك يستفيد.
كان معاك الكاتب محمد صاوي، أشوفك في رحلة تانية قريب بإذن الله.

المصادر:
القرآن الكريم.
صحيح مسلم.

تصميم الغلاف العبقري (كريم وحيد)، وده لينك الصفحة بتاعته ادعموه واعملوا له لايك:
https://www.facebook.com/KareemDesighner/

-
وآخرًا كلها اجتهادات من العلماء في تفسير كتاب الله، والله أعلى وأعلم بصحتها.
-

- لو وصلت لحد هنا يبقى المقال انتهى، ولو مهتم بالمقالات الغريبة والمثيرة للاهتمام، تابعني واعمل (شاهد أولًا)، بنزل مقال شبه يومي باستمرار.
وادخل البروفايل هتلاقي مقالات كتير جدًا ممكن تقرأها براحتك.
ويا ريت متنساش الشير والتفاعل مع المقال لو حابب إني استمر كدعم ليا، وكمان اعمل منشن لصديق ليك بتحبه يقرأ معاك ورشحه يعمل فولو للبروفايل❤

ولو مهتم بمحتوى مختلف بينزل بشكل شبه يومي على البيدج بتاعتي اعملها لايك وده اللينك بتاعها: https://www.facebook.com/Mohamed.sawy99

ولو مهتم تكون موجود في بيت العيلة والجروب الخاص بينا كلنا اللي ممكن تنشر فيه أي حاجة تخصني براحتك ده اللينك انضم: https://www.facebook.com/groups/2377411919031522

ولو ليك في الإنستجرام علشان هيبقى فيه شغل عليه الفترة الجاية ده اللينك: https://instagram.com/mohamed_sawy16?igshid=w18h6y9ej979

ولو بتحب تويتر ده اللينك بتاعي برضه شغال عليه: https://mobile.twitter.com/Mohamed10975091

الشير متاح، ولكن ممنوع الكوبي بيست، لأني بتعب جدًا في المقالات اللي بكتبها، فيا ريت متبخلش بالشير ومتأذنيش بالكوبي بيست.

مهم تشوفوا أول كومنت❤👇

#مقالات_محمد_صاوي!¡
#محمد_صاوي!¡